شخابيط ع الحيط: شخابيط ع الحيط ..9

الجمعة، 29 يناير 2010

شخابيط ع الحيط ..9

يا طالع الشجرة ..
من زمن سايبة هناك فكرة ..
و أمل و حنين و ذكرى ..
و روح مشتاقة لأحلى بكرا ..
وصيتك الأمل و خليك حنين ع الذكرى

حاجات و محتاجات ..
رايحة و جاية ..
وعاملة جلبّة و هي معدية ..
و لا تلاقي برضوا روح واحدة مرضية ..
تكونش هي من الفرحة و الرضا معفيّة !!!

و كأنه كان إمبارح ..
لما كنت ست سنين ..
ماشية بضفرتين ..
و بأجمل إبتسامة مرسومة ع الخدين ..
و بأكبر ايدين في وش الدنيا مفتوحين ..
و دماغ مليانة أحلام ملونة أحلى من البلالين

في الحيرة دايما قلقان ..
وقاعد لروحك سَجان ..
و مصاحب اللي بحزنه دايماً غرقان ..
بتقتل جواك الإنسان ..
و مرضيتش تبقى مبدع و فنان ..
و آخرتها مستغرب روحك و زعلان

مفرفشة و منعنشة ..
و حاطة للدنيا فيونكة مدندشة ..
و بشر هايصة و مهيسة ..
ماشين يقولوا عيد سعيد يا ناس يا كويسة

آيــة

:-)