~
بنفس فكرة التطعيم اللي بنأخده و إحنا أطفال
بيتفضل ماشية بعد كدا طول حياة البني آدم
من مواقف ، و أحداث ، و أشخاص
المواقف و الأحداث
بتكون واقفة على عوامل كتير
يعني في الأول و الآخر ..
غير متعمدة
الأشخاص بقى
بيكونوا غالباً متعمدين
و مواقفهم ، مع سبق الإصرار و الترصد
متربصين بيك
و استقطعوا وقت من حياتهم يدوروا وراك
اسمك بيتحشر - بالسلب- في أحاديثهم من غير سبب
فعلك .. بيتحلل لـِ 100 قطعة
بيحطوا إفتراضات تخصك .. و كلها مش لطيفة
كل شئ مؤذي مش بيتأخروا عنك فيه
عاملين بالظبط زي البكتيريا و الفيروسات
عايزة تنتشر في كل كيانك
عايزة تأخد من روحك
عايزاك تتوه عن نفسك
مع انه ممكن جداً
تحولهم بمنتهى البساطة لـِ فاكسنشين
هيتعبك في الأول آه
هتسخن .. إحتمال
لمدة كام ساعة بس
و بعدها هما هيكونوا سبب
أنك بقيت أقوى ، و أحسن
--------
فلذلك
السادة اللطاف
متخصصى التنغيص علىّ في حياتي ..
شكراً بجد ..
بتعلم بسببكم أكون
" أقوى ، أحسن ، أرقى " .
تشكرات من كل قلبي .
~
آية الملواني
10/1/2011
